Symposium
Et voetballen hoolt jaorliks een symposium. Ok et hadfietsen en ’t volleyballen orgeniseren geregeld infermerende bi’jienkomsten onder de naeme symposium of congres. Mien alderbeste kammeraod Jean-Pierre hiere orgeniseert ok graeg es wat…
Nog mar krek een peer maonden bi’j de plaetselike klup vun ik begin augustus opiens een uutneudiging in de brievebusse mit de vraoge om mit te doen an een symposium over oonze edele sport, et petanque. Neffens de persoonlike ‘invitation’ van de FIPJP, zol et driedaegse symposium hullen wodden op 16, 17 en 18 september in hotel ‘Les Boules’ an de ‘Rue de Pétanque’ in Lusigny, niet iens zo hier veer van huus, hier bi’j mi’j in ‘La douche France’. Liekewel de naeme van et hotel as de straotnaeme leken mi’j wel wat overdreven toepasselik veur dit congres mar ik vreug mi’j nog meer of hoe de orgeniserende bond et zo raoden kund hadde dat ik haost alle jaoren rond die tied daor toch vaeke al in die omkrieten was. Toeval bestaot ommes niet?
Krek as wel vaeker maek ik rond die tijd in september/oktober een camperreize rond Lusigny. Verjaordaegen van een peer kammeraoden en even veerderop een fesien bi’j een vrundinne bin al een peer jaor een mooie anleidinge veur die reize. Die vrundschoppen bestaon liekwels al uut mien hippietied, doe we mekeer troffen tiedens et begin van de droeveplok. Ok dit jaor ston die reize daorhenne weer in mien agende. Uut eerdere erverings wee’k dat et in Frankriek vaeks de gewoonte is om in je uppien naor een symposium te gaon. De geerkomsten wodden vaeks niet alliend orgeniseerd om kennis en meugelikheden over et onderwarp mit mekeer te bepraoten mar wodden veural ok bruukt as een soortement van bourgondische reünie van de congresgaonders. En daor heuren niet al te vule eigen bekenden en aandere pottekiekers bi’j! Et idee daoraachter staot me dan ok wel an.
Et was nog slim vroeg doe’k halverwegens de Rue de la Mairie rechtsof de Rue de la Pétanque insleug en ik hadde dan ok alle tied om de straote wel drie keer op en daele te rieden. Dat bleek ok hadde neudig. Disse straote zag d’r now niet bepaold uut as een omgeving waor internationaole congressen of symposiums hullen wodden zollen, leek mi’j zo toe. Et was eins mar een gewoon burgerstraotien zoas d’r wel dattien in een elftal op iene haand te tellen binnen. Mooie witte huzen en de meersten ommeheind mit mooie wit schilderd hoolten hekkies. D’r was liekewel gien hotel of zo’kswat dat daor een betien op liekt, te bekennen.
Een telefoontien naor de siktaoris van oonze eigen club leverde niks op. D’r was him niks bekend over een symposium in Lusigny. Nao de straote nog es hielendal op en daele deur te rieden en nao nog es twie keer vraogd te hebben he’k et symposium mar opgeven en bin ‘k naor mien kammeraoden veerderop deurreden.
Op de eerstvolgende speulmiddag nao mien reize, weeromme bi’j mien eigen kluppien, kwam mien alderbeste kammeraod Jean-Pierre geliek op mi’j toelopen, vreug hoe ’t me op et symposium vergaon was, en a’k et vienen kund hadde…
© Piet/er Bult (www.pbinfr.eu)
Uut de riegel: ‘Petanque en sabots’ (Petanque op klompen)