Veurjoarstango (Coby Poelman-Duisterwinkel)
Op oadem van de wiend
danst roze bloesem zaacht
de veurjoarstango,
n week leden
was de boom nog koal
ien schoarse openingen
wachten appelbomen.
Acht doagen ien t joar
duurt dizze lentetooi
de halve buurt is uutlopen
wachters zuchten
o wat is ze mooi,
den vaalt ze uutbluid
as confetti over t groen,
zo opent dizze tango
ien feestklaid t seizoen.
