Bolleverieniging
Op ‘t dörp waor as ik geboren en opgruuid bin, hadden we doedertied een bolleverieniging. Uut de statuten (art.1) kuwwe opmaeken dat de oprichting plak vunnen het op 4 Meie 1917. Een stokmennig boeren, die as wel es wat koenen hebben wollen mit een beter exterieur én een hogere perduktie, gongen d’r dan tegere een dag op uut en kochten een bolle bi’j een topfokker uut et lege midden van de perveensie. In art. 3 lezen we: Het doel der vereniging is den veestapel der leden te verbeteren en in art. 4 lezen we: Zij tracht dit doel te bereiken door het aanschaffen en aanhouden van uitmuntende fokstieren. Veurdat de koop sleuten wodde, mos een veearts et sperma vangen en microscopisch kieken of d’r genoeg aktieve zaodcellen in zatten. De bolle kwam dan bi’j iene van de leden op stal te staon.
De verieniging ston wel onder toezicht van de Provinciale Commissie voor de Veefokkerij in Friesland. As mien geheugen me niet in de steek lat, weren d’r zes boeren lid van disse klub. Je konnen niet zomar lid wodden, want in art. 6 lezen we: Over de toetreding beslist de ledenvergadering. Ieder lid van de vereniging is zedelijk verplicht lid te zijn van het F.R.S. Now was et wel zo dat die bedrieven een knap aende uut mekeer laggen en daor kwam nog bi’j dat een twietal hiervan bi’j toerbeurten de bolle huusvesten. Zo kon et gebeuren dat wi’j, morgens tiedens et haandmelken, murken dat iene van de koenen bols was. Et dier wodde dan aachter de waegen bunnen en kon lopend mit naor huus. Nao et morgensbroggien mochten mien breur en ik, mit de koe tussen oons in, naor de bollehoolder lopen. Dat was dan een kuier van krapan anderhalve kilometer. As de bolle die morgen al een peer keer dekt had en de aorighied d’r daordeur wat of was, kon et best een ure duren veurdawwe weer op huus an gaon konnen. As we de koe daornao weeromme brocht hadden naor et stok laand waor as hi’j henne mos, was et grootste diel van de morgen veurbi’j. Dan kon et ók nog gebeuren dat heit in de loop van de morgen even naor de pinken fietst was om de waeterbak vol te scheppen, uut de sloot d’r naost. Leup daor dan een pinke bi’j die slim onrustig was, dan mochten wi’j middags dezelde gang nog es maeken. We weren dan krek veur melkerstied weer thuus. Twie mannen, ien volle dag, doende om twie van heur beesten drachtig te kriegen. Dit speulde him roegweg zestig jaor leden of. Jow kunnen je, mit de bedriefsvoering van disse tied, zoks niet meer veurstellen.
Wodt vervolgd.