Berkoop. Donderdagmiddag 10 meert wodde bi’j de Stellingwarver Schrieversronte in Berkoop et mediaboekien Op ’e luuster staon prissenteeerd. Op ’e cd van et mediaboekien bin verhaelen van H.J. Bergveld, Johan Veenstra en Klaas van der Weg te heuren. As ofwisseling bin op de cd butendat een tal lieties van Henk Bloemhof opneumen. Et mediaboekien is koppeld an et veurleesprojekt veur oolderen zoas dat al een stokmennig jaoren lopt, en dat now veerder uutbreided is naor de kleine dörpen toe
Eerste exemplaor veur Femmie van Veen
Et eerste exemplaor van et mediaboekien wodde deur SSR-veurzitter Ype Dojkstra uutrikt an veurlezer Femmie van Veen. Al sund de invoering van et vak Hiemkunde in et basisonderwies is de inwoonster van Hooltpae arg aktief mit et veurlezen van verhaelen. Zo lest ze veur t.b.v. de hiemkundewebstee stellingwerf-heemkunde.nl, mar dot ok mit an de Tomke-veurleesweke in juni én tiedens de winterveurleesaktie veur oolderen, zoas die disse weke ok weer holen is, zo vertelde Dijkstra. ‘Jow hebben dit eerste exemplaor van ’Op ’e luuster staon’ as bliek van grote wardering meer as verdiend!’
Dijkstra gong in zien praotien ok nog even in op et belang van et veurlezen in et Stellingwarfs. Dat belang gelt liekegoed veur de jeugd as veur de oolderen, zo vun hi’j.
Tiedens de middag lazzen Femmie van Veen en Klaas Dijkstra veur, wiels Henk Bloemhoff een vuuftal Stellingwarver lieties heuren leut. Spietig genoeg kon Johan Veenstra deur ere verplichtings de middag niet bi’jwonen.
Tekst: Stellingwarver Schrieversronte; Foto: Lenus van der Broek