Sunderklaos?? Saemenspraok veur drie man.

Beste meensken, aorig daj’m ofstemd hebben op radio WOS, de omroep van de Stellingwarven.

Taovend bin bi’j mi’j, J. Doedel, te gaaste, de heer P. Lut en vrouw O. Nozel.

Welkom allebeide.

Lao’we mar geliek uut ende zetten.

J. Doedel:

Hej’m et al heurd?

P. Lut:

Wat heurd?

J. Doedel:

Sunderklaos wil de baord ofscheren en him et haor knippen laoten .

Naor ik verneumen hebbe, komt d’r een kleurtien in.

Wat zeg ik? Een kleurtien? Alle kleuren van de regenboge.

O. Nozel:

’t Is toch niet waor zeker?

J. Doedel:

Jawis, en hi’j vint dat et now ok tied wodt om uut de kaaste te kommen.

O. Nozel:

Et moet niet malder wodden.

P. Lut:

Niks van heurd. Niks van zien en niks van lezen. Hoe kommen je d’r op?

J. doedel:

Et staot op FB en twitter. Moej’ mar es kieken.

O. Nozel:

Ik doe niet an twitter en zoks, mar je maeken me al beni’jd.

Oh grote griezels daor staot dat de goedheilig man beschuldigd wodt van slaverni’j.

Hier, lees mar.

Disse vremde kerel, die himzels tot heilige Klaos verklaord het, is hieltied omringd deur vremd uutdoste jongkerels. Hi’j lat ze de huud zwat varven, ze kriegen grote ringen in et oor en moeten alderhaande keunsten vertonen. Een typisch veurbeeld van mederne slaverni’j. Et moet verbeuden wodden.

 

Oh, lieve sei, en moej’ toch es kieken wat hier staot.


Klaos antwoordet; ze kun van mi’j et dak op, of de zak kriegen, of allebeide. Et maekt mi’j niet uut. Butendat bin ‘k dat geëamel over de Pieten meer as zat. Veur mien pat kleuren ze heurzels pimpelpaors. Ik passe me wel an. Morgen gaon de baord en de lange lokken d’rof. Ik neme een tattoo, een peer reusachtige oorbellen en laote mi’j et haor varven in alle kleuren van de regenboge.

Ik zie nargens wat over uut de kaaste kommen. Wat dot zoe’n man trouwens in een kaaste?

P. Lut:

Ik daenke dat de sint in et verkeerde lichem zit.

O. Nozel:

Niet in de kaaste? In een lichem? Ik begriepe d’r niks van, mar toe mar, ik zal et doukies wel argens heuren, zien of lezen.

J. Doedel:

Dit was et al weer beste meensken. De uutzending; -Hej’t al heurd, zien of lezen?- zit d’r weer op.

Bedaankt veur et luusteren en tot ankommende weke. En jim weten et; laot jim niks wiesmaken.

 

Graeg vernemen we jow reaksie

Deze site gebruikt Akismet om spam te verminderen. Bekijk hoe je reactie-gegevens worden verwerkt.