In de Stellingwarven kuj’ een stokmennig hiel aorige musea vienen.

Iene van de bekendsten is waorschienlik ‘Et Vlechtmuseum’ in Noordwoolde. Een eerbetoon an een ambacht van jaoren herwerts.

Hiel bezunder is et ‘centrum voor prentkunst’ van Stichting Nobilis in de Fochtel.

Stichting Nobilis zet him in veur de promosie van grafische keunst en het zels ok een behoorlike kollektie die nog hieltied uutbreided wodt.

Zels mag ik graeg in iene van de kleine musea liekas ‘Et Kiekhuus’ in Wolvege rondstrunen. As bezuker kom ie daor ogen tekot. Et iene is al mooier as et ere en alles ropt herinnerings op.

Nee, ik vertelle niet wat d’r allemaole te zien is. Jim moe’n zels mar es kieken gaon.

In Makkinge vienen we museum ‘Oold Ark’, naost korenmeule ‘De Weyert’.

‘Oold Ark’, de naeme zegt et al. Alderhaande ark van eertieds. De tied doe d’r nog gien stroom was. Alles gebeurde mit haandkracht. Je vienen d’r gien gereedschop waor as een stekker anzit.

Ik magge daor graeg es even binnenlopen mit de beppezeggers.

In de huuskaemer en et aachterhuus valen ze van de iene verbaozing en de aandere. Et ‘waor is dit veur?’ is niet van de locht.

In de naomaekte warkplaetsen kunnen ze heur een beeld vormen over hoe dat ark deur bi’jgelieks de timmerman of de schilder doedertieden bruukt wodde. De vri’jwilligers zullen d’r graeg alles over uutleggen.

A’k ze bi’j de veneri’je vertelle dat mien pappe ok op disse meniere turf wun. Dat de turven die bi’j de winterdag in de kachel gongen veur oonze verwaarming zorgden. Of dat mien pake winters van die maanties en heidebuunders maekte, dan kieken ze asof dissend de pre-historie mit maekt hebben.

Laot ze now in et museum van de zoemer een tentoonstelling hebben van ark dat zoe’n 14.000 jaor leden in disse kontreinen bruukt wodde.

Tied dus om ze kennis maeken te laoten mit et ooldste ark.

We haelen dan geliek een stok of wat poedegies pannekoeke- en cakemael.

Mael, maeld deur korenmeule ‘De Weyert”.

Roely