Wetenschop

Een schoffien leden publiseerde mien alderbeste kammeraod Jean-Pierre een wetenschoppelik artikel in oons maondeliks klupblad van oons dörps petanque. Et maanse repot hadde as titel ‘Petanque, een gezonde vervanger in plak van rookverslaving’. Nao lezinge en nog es lezing van et repot leuten de oordielen en konklusies mien wenkbrauwen nogal gauw es froonsen en op de eerstkommende speulmiddag vreu’k mien alderbeste vrund JP dan ok et repot een betien bi’j mi’j toelichten te willen en stelde ik him de vraoge:

– Alderbeste kammeraod Jean-Pierre, begon ik, bi’j hoevule personen hej’ dat onderzuuk eins uutvoerd?
– Bi’j ongeveer zestig miljoen fraansen, was zien bescheid.
– Own. Hoe was de verholing van niet-speulende rokers ten opzichte van niet-rokende speulders dan?
– Honderd tegen nul percent. Iedere niet-speulder rookte, gieniene uutzunderd.
– En hoe was dan de verholing van rokers en niet-rokers tiedens et speulen van een wedstried petanque?
– Nul tegen honderd percent. Gieniene van de speulders rookte, zee JP slim zelsverzekerd.
– En dat hej’ bi’j al die zestig miljoen fraansen persoonlik vaastesteld?
– Now nee, niet bi’j iederiene strikt persoonlik vanzels mar wel middels een slim wetenschoppelik verantwoorde stikproef. Veur mien onderzuuk he’k et oflopen jaor deur hiel Frankriek op meer as tien verschillende plakken speuld en vun overal percies de zelde uutkomst. Zegge, dat iedere JdB-verieninge deurmekeer zoe’n zeuventig tot tachtig leden het, dan he’k toch zeker rond zeuvenhonderdvuuftig meensken observeerd. Veural in ’t geval van honderd perocent maj’ de grafiek van een stikproef in de wetenschop dan rustig deurtrekken naor iedere groepsgrootte.

Op dat stuit wodde d’r hadde op de deure boonsd en kammeraod Jean-Pierre wodde reupen om te speulen. Hi’j drokte zien peukien uut, gong et rookhokke uut en leup mit zien drie ballen naor de baene. Doe ik, nog wat naofileseferende over JP zien onderzuuk en mit een sigaretien tussen mien lippen om mi’j henne keek, zag ik inderdaod ok honderd procent rokers die niet speulden mar saemenpakt in et rookhokke stonnen te paffen. En doe ‘k even naotied buten leup tiedens et speulen van een volgende perti’j, za’k inderdaod ok honderd percent speulders die niet rookten.

Nao dit onderzuuk deur mien alderbeste kammeraod Jean-Pierre, is now dan ok wetenschoppelik vaastesteld: Et speulen van Petanque is een gezonde vervanger veur je rookverslaving…

© Piet/er Bult (www.pbinfr.eu)
Uut de riegel: ‘Petanque en sabots’ (Petanque op klompen)

2

Graeg vernemen we jow reaksie. In et veuren daank

Deze website gebruikt Akismet om spam te verminderen. Bekijk hoe je reactie-gegevens worden verwerkt.