Vraogd, een tireur…

Vraogd

Doubletpartner (liefst een tireur) veur een toernooi in Peries

Nog veur et ankem weekaende melden bi’j Françoise s.v.p.

——————————————————————-

Disse tekst ston mit koeieletters op een groot stok pepier op et prikbod. Bi’j et binnengaon van de kantine van oonze petanque club, koj’ die dan ok haost niet missen. Ik vun ’t eins wat vremd da’k d’r gieniene over praoten heurde. Zoe’n vraoge liekt mi’j toch ét gesprek van de dag bi’j oonze club ‘Une boule plaisir’.

In de waachttied tussen twie wedstrieden in, zocht ik Françoise even op en vreug heur over de adverteensie. Doe ze zee dat d’r nog gieniene bi’j heur west hadde, trok ik spontaon de stoute klompen an. In ’t halve jaor da’k heur en heur speulkeunsten now kende, ha’k bliekber as ienigste domweg et lef om mien ammeteurkeunsten bi’j heur an te bieden. ‘Mar waoromme gaot je eigen Jean-Pierre eins niet gewoon mit?’ was mien vraoge. ‘Och, J-P het al drie daegen migraine en het d’r daoromme opiens gien aorighied meer an. Mar ja, we hebben de reis- en dielnaemekosten al betaeld en ik wil sowieso eins wel henne, vandaor.’

(…)

Eerlik is eerlik, op de dag van et toernooi in Peries speulden we mit zien beidend warkelik de goolden steerns van de hemel. We raekten, wonder boven wonder, in de achtste en alderdeegst in de kwatfinaole. De halve en de grote finaole zol liekwels de aandere daegs speuld wodden…
Wiels we aovens an de bar van et hotellegien zatten, belde Françoise opgelaoten naor heur thuusfront en zee ok drekt dawwe dus toch echt een naacht overblieven mossen. Ik zag an heur gezichte dat heur J-P et daor toch wel een betien muuilik mit hadde. ‘Hoe zuj’m dat dan hebben?’ vuulde ik zien vraoge, ‘We hebben ommes mar iene kaemer veur oons beidend boekt!’

Op dat stuit gaot de wekker. Et is zeuven ure morgens en et wark ropt. Mit nog slaoperige ogen kiek ik om mi’j henne, herkenne de eigen slaopkaemer en zie mien eigen vrouw gewoon naost mi’j liggen. ‘Zuj’ die wekker now nog es een klap op ‘e kop geven of moet ik et doen?’ heur ik heur brommen. En daormit spattert mien Midzoemernaachtdroom geliek in meer as duzend stokkies uuteneer…

© Piet/er Bult (www.pbinfr.eu)
Uut de riegel: ‘Petanque en sabots’ (Petanque op klompen)

0

Graeg vernemen we jow reaksie. In et veuren daank

Deze website gebruikt Akismet om spam te verminderen. Bekijk hoe je reactie-gegevens worden verwerkt.