Keuninklik bezuuk…

Keuninklik bezuuk…

D’r kwammen een peer grote staotige auto’s et terrein oprieden en d’r stapte een keuninklik peer uut dat een perti’jgien petanque mit oons speulen wol…

Op et stuit dat de indieling van die speulmiddag bekendmaekt wodden zol, gong de siktaoris op een stoel staon en vreug even al oonze andacht. Want d’r was een slim gewichtige brief van de BVD kommen waoin ston dat d’r ankem weke zaoterdag hoog bezuuk langes kommen zol. Ja, zegge mar gerust, hiel hoog bezuuk, alderdeegst keuninklik. De siktaoris vreug alle leden om heur de kommende weke beschikber te holen om de boel es grondig op te knappen zodat de speulbaenen en de kantine d’r veur dat hoge bezuuk piekfijn en strak glimmend uut zol kommen te zien.

De hiele weke wodde d’r deur haost alle leden drok an warkt. De bomen, de heden en de grösveldies rond de baenen wodden mit de precisie van een naegelscheertien kotwiekt. Al et hooltwark wodde nauwkeurig opschoerd en opni’j in een glimmende laklaoge zet. De bielzen rond de verschillende speulbaenen wodden buund en sopt mit een frisse laoge butenbeits. Et tegelpattien wodde glad en strak maekt en in de kantine wodde al et glaswark en posselein konterleerd op breuk en scheurties. De taofelkliedjes, gedienen en overgedienen wodden wusken en alderdeegst de vlekken in et vloerklied wodden grondig bosseld en buuind. Giendertied, alderdeegst drekt nao de ni’jbouw niet, hadde de akkemmedaosie d’r zo spik-en-span bi’jlegen.

De aandere zaoterdags was iederiene toch wel een betien zenuwachtig. Et hiele bestuur was in al zien allure anwezig. In ofwaachting van et hoge bezuuk durfde eins gieniene alvaaste een ballegien te gooien op de smetteloos anharkte baenen. Hier en daore wodde nog vlogge wat rechtzet of gladstreken en iederiene was knipt en gladscheerd op disse speciaole speulmiddag verschenen. Een enkeling hadde him alderdeegst in een kompleet ni’je outfit steuken.

Doe d’r twie grote donkerblauwe auto’s et terrein oprieden kwammen, gongen de meerste manluden haost automaotisch in ’t gelid staon om et hoge bezuuk welkom te hieten. Et Wilhelmus zol alderdeegst haost inzet wodden doe de deure van de veurste limousine eupen gong. D’r stapte een jongkerel uut in sportieve kleraosie, drekt daor aachteran een vrommes in een lieke keurig mar toch ok sportief ogend maantelpakkien. Beiden dreugen ze een bescheiden kroontien op heur heufd.

Ok van de twiede grote auto zwaaide now een deure eupen. Et duurde even mar nao een posien weerkende ik onder de hoge hoed en aachter de anplakte snor mien allerbeste kammeraod Jan, in een donker strepiespak mit gesteven boord en strik. Hi’j dee een peer stappen naor veuren. Een uutvergrote brief mit de keuninklike ankondiging van de BVD hul hi’j triomfaantelik omhogens, bedaankte et bestuur en alle klubleden briedvoerig veur et wark wat de oflopen weke verzet was en weenskte oons een plezierige speulmiddag mit et keuninklik uutziende stellegien.

Tja, ok as et bi’jtieden even een keer of wat niet lokken wil om genoeg vri’jwilligers te vienen veur bi’jglieks et groot onderhoold van de baenen of de kantine, dan het mien allerbeste kammeraod Jan altied wel een ludieke oplossing veurhanen.

© Piet/er Bult (www.pbinfr.eu)

Uut de riegel: ‘Petanque en sabots’ (Petanque op klompen)

Graeg vernemen we jow reaksie

Deze site gebruikt Akismet om spam te verminderen. Bekijk hoe je reactie-gegevens worden verwerkt.