Fraanse Piet (1)

Alle zeuvende jaoren van je leven zoj’ eins vri’j kriegen of nemen moeten van de baos. Zoe’n sabbatsjaor is vaeks slim gezond veur lichem en geest. Krek as wel meer Stellingwarvers heb ik intied mien tiende ‘sabbatical’ al opmaekt. Now ja, eins bin ‘k daor een peer jaor leden al an begonnen. Nao oplevering van de ‘Biebel in et Stellingwarfs’ ha’k krek de gaank weer te pakken in et gewone wark, doe d’r op 11-12-13 opiens vanalles fout gong.

Opiens hadde de vrouw een aander, bin ík overhaost verhuusd naor ginne kaante van de Kuunder en ha’k opiens ok hielemaole gien nocht meer an mien wark. En omreden de hieltied gesodemieter in et -veur mi’j- haost wat te kleine Stellingwarfse taelwereltien bin ‘k doe ok mar mit mien schrieveri’je opholen. En ja, aj’ dan van alles niks meer doen dan gaoj’ je vervelen en gaoj’ nussieszuken.

Now, een peer jaor naotied, geleuf ik da’k een ni’j nussien vunnen hebbe, en et leven van alledag weer aorig op regel hebbe. Vrouwluden hool ik now mar wat op ’n ofstaand en hool dan alliend zo now en dan es iene an om es gezellig mit uut eten te gaon, veur een speuls weekaende of hiel soms ok wel es veur een hiele weke. Ik geleuf, ik hael mi’j mar gien vaaste verkering meer an. En de Stellingwarven en Frieslaand bin meraokels mooi mar ik hebbe een haost lieke mooie omgeving vunnen om te wonen. Mit mien komputerwark wa’k dus al hielemaole ophullen en daor begin ik ok niet weer an. En et Stellingwarfs he’k, bi’j slot van zaeke, inruild veur… et Fraans. Ja, haost alle schippen he’k verbraand aachter mi’j laoten en ik ete, drinke en bin de grootste helte van de tied now slim vrolik in et grote, zunnige Fraanse laand. En vandaor zwarf ik in mien oolde campertien wat deur de rest van West-Europe.

Et voldot mi’j hier in midden-west Frankriek dan ok ommeraek. A’k thuus bin dan speul ik een protte middaegen in de weke petanque (jeu de boules) mit een stokmennig dörpsmannegies en ik hebbe mi’j in de roem drie jaor tied da’k hier now huze, beheurlik inleefd in de historie van mien ni’je dörpien, La Trimouille, mit zien ongeveer negenhonderd inwoners. Dit dörp wodt veur et eerst op schrift nuumd an et aende van de elfde ieuw. Zo now en dan gao ‘k mit de buur-wede-vrouw naor een meziek- of zanguutvoering in de grote dörpskarke en zaoterdags of zundags gao ‘k geregeld even naor et voetballen in et ‘stade municipal’ (voetbalveld van de gemiente) staon te kieken.

De schrieveri’je he’k kalmpiesan toch ok mar weer wat oppakt, mar dan veural over mien belevenissen in dit grote, gemoedelike laand, La Douce France (LDF, et gemoedelike Frankriek) en de vuvendattigduzend kilemeter (veurig jaor) zwarven in een oolde camper. Lichtkaans is et veur pattie Stellingwarver wel aorig om mit mien stokkies veur de webstee ‘Bekiek et mar’ een betien mit te beleven van wat ik hier zoal omhanen hebbe, uutspoke en deengies die ‘k bi’j toeval tegenkomme. Tot mien volgende stokkien, dan mar.

En aj’t d’r nog es persoonlik mit mi’j over hebben willen, stuur ie mar een e-berichien naor info@pbinfr.eu. Mien webstee het intied ok weer wat anvullings www.pbinfr.eu.

Piet/er Bult

 

Graeg vernemen we jow reaksie

Deze site gebruikt Akismet om spam te verminderen. Bekijk hoe je reactie-gegevens worden verwerkt.