De stagiair

De stagiair

Tegenworig gaon boeren-in-spe vaeke in de vremte stagelopen.

Op een zundag in juli kwam hi’j in zien autogien de dam oprieden. Een auto mit een fraans nommerbod warempel. Hi’j, Luc Menard hadde et bedrief in de kaortebak van zien schoele vunnen. Een bedrief mit koenen en waor de boer ok Ingels praotte. Et was een grote weensk van de schoele, dat de jongen, as zi’j heur diploma kregen, de ingelse tael verstaon konnen en een ienvooldig gesprek in die vremde tael voeren konnen.

Veur Luc wodde de uutfanhuuskaemer veur 4 weken zien onderkommen. De aandere morgen hadde hi’j mit zien tiedelike boer een rondleiding over et bedrief. Ze weren bi’j et laand van huus, waor de pinken en dreuge koenen leupen en bi’j et laand, waor de mais d’r deur de dreugte ston te verpieteren.

Nao de koffie mos hi’j de hanen uut de mouwen stikken. De ligboksstal mos schonemaekt wodden mit de hogedrokspuite. Op een aandere dag mos de kuilbult blootmaekt wodden, omdat deur de 4 weken durende dreugte de koenen bi’jvoerd wodden mossen. D’r was niet genoeg grös meer veur te koenen. D’r lag een roodbrune glaans over de landeri’jen.

Hi’j gong mit de boer en zien arbeider mit naor aandere boeren om  te zien, hoe zi’j heur boerkeri’j op odder hullen. Hi’j mos mit de boer melken. De boer, die slim inneumen was mit disse jonge Fraansman, leut him allerhaande warkzemheden doen. Al mit een weke wodde et melken een keer an him overlaoten.

De tael vul niet mit. Zien stagebieder sprak schoele-Ingels. Veur him somtieden muuilik te begriepen. Aandersomme gul etselde veur et Fraans van Luc. Aovens wodde dan vaeke praot over zien thuus mit et ingelse en fraanse woordenboek in de anslag. Op die meniere konnen zi’j et aorig praotende holen.

Op een mooie zunnige dag nam de boer en zien vrouw him een daggien d’r mit opuut.

Een dag veren over de friese meren. Hi’j het daor geweldig van geneuten. Een extra dag vri’j vun hi’j super. Hi’j was d’r toch ok veur et wark, leut hi’j de boer op zoe’n dag weten.

Nao vier weken reisde hi’j weer of naor de boerkeri’j van zien oolden.

 

In de ingelse brief, die hi’j een weke laeter schreef, ston dat zien mem ‘amazed’ was over dat heur zeune d’r zo glaanzend uutzag. Dat moet grif kommen wezen van et lekkere eten, dat him elke dag weer deur de vrouw van de boer veurzet was.

 

Kees Koopstra
0

Graeg vernemen we jow reaksie. In et veuren daank

This site uses Akismet to reduce spam. Learn how your comment data is processed.