Derizzerd kriegt stadsallures!
Dat zit zo: deheren van staand, zoas Ollie B. Bommel wel zeggen zol, de heren van staand hebben een club opricht’ Ja, ze bestaaon al een peer jaor heur!
Ze numen et “de Herenclub”. Persoonlik vien ik “Mannenclub” vule stoerder klinken mar ja’ d’r binnen zovule mannen …. waor begin ie an!
“Heren binnen d’r toch minder”, daenken ze zeker. ‘Vrouwluden binnen niet welkom! Da’s oonze eigen schuld. Bi’j de vrouwen-verienigings wollen wi’j gien kiek op ‘e hanen deur manluden. De Plattelaandsvrouwen wodden gekscherend “Plattevrouwen” nuumd. Zi’j numen heur now “Vrouwen van Nu”. Hebben we dommiet ok een aandere naeme, een betien gekscherend, veur de Herenclub? Ien keer in de maond hebben ze een bi’jienkoomst in et Dörpshuus. Ik heurde lestend iene van die mannen zeggen, dat ie naor Yvonne gong. Die naeme sprak ie zo erotisch uut, dat zien vrouw ‘m van de ziedkaante ankeek mit een blik die niet vule goeds veurspelde as hi’j weer thuuskwam. Zien vrouw hiet, geleuve ik, Iebeltien.
Zoks bekt toch hiel aanders, zegnow zelf… Iebeltien!
Mar dat dot d’r now niet toe. Vrogger gongen de Heren naor de sociëteit. Op oolde foto’s ko’j’ zien, hoe zoks d’romme toegong. Mannen mit prachtig dri’jde snorren, dikke boeken, goolden gelosiekettings in et fikkien op’e bost en zatten in grote fauteuils rond de stamtaofel. Rookten havanna,s en dronken dikke belle Fraanse kejak.
Et kan mar zo wezen, dat et bi’j de alderhoogste bobo’s nog krekt zo gaot, daor wi’k ofwezen! Roken in et Dörpshuus is van hogerhaand verbeuden. Seins zie’k nog wel es een peer mannen in spiekerbroek en trui kleumend een shaggien dri’jen.
En Yvonne zal grif gien Fraanse kejak in veurraod hebben, laot staon dat iene dat nog drinkt! Grote puntsnorren binnen uut de mode, dure gelosies valen niet meer zo op onder de mouwen. De Herenlub is niet zo mar een gezellighiedscluppien. Nee, zi’j wodden veurlocht op aller- haande gebied deur experts! Ok gaon ze now en dan op excursie naor bedrieven. Zo wodden ze nog slimmer as dat ze al binnen! Mar uutaendelik vienen ze et et mooiste, dat ze mit mannen onder elkaander een noflike aovend hebben en zbks gun ik heur van harte!