Kastverhael

   Jimmy het et oolde kastverhael ommezet in et Stellingwarfs.

KASTVERHAEL

Et was in die daegen zo dat keizer Augustus een volkstelling doen wol.

Dat daoromme gongen alle meensken op pad om heur inschrieven te laoten. Iederiene gong naor et plak waoras hi’j geboren was.

Jozef gong ok vanzels. Hi’j mos naor Bethlehem, de stad van keuning David. In de veerte was hi’j daor nog femilie van. Een hiele reize van Nazareth naor Bethlehem. Hi’j gong tegere mit Maria, de vrouw waoras hi’j mit onder de gebodens ston. Maria zol al gauw een poppien kriegen. Een bezwaorlike reize dus.

Doe ze te plak weren in Bethlehem vunnen ze gien onderdak. Ze wodden naor een lege stal stuurd. Et deed al gauw blieken dat et Maria heur tied was. Ze kreeg een zeune. Vule gerak was d’r niet. Ze pakte him in wat doeken en een voerbak was zien wiegien. Daor legden ze him in.

In de streek rondom Bethlehem weren huders, die naachs butendeure op de schaopen pasten. Ze zaten bi’j mekeer doe d’r inienen in een zee van locht, een ingel ston. Ze weren slimme benauwd. De ingel zee: “Wees mar niet bange, ik hebbe groot ni’js veur jim en veur alle meensken van de hiele wereld. Vandaege is in Bethlehem, de stad van keuning David, de zeune van God geboren. Hi’j is de redder van de wereld. Christus de Heer. Gao mar gauw kieken. Je moe’n et poppien zuken in een stal. Zien kleren bin doeken en zien wiegien is een voerbak.”

Zomar inienen weren d’r vule meer ingels. Ze zongen veur God: “Ere zij God, in de hoge en vrede op eerde bi’j alle meensken die Hi’j graeg het.”

Doe keerden de ingels weeromme naor de hemel. De huders zeden tegen mekeer. “Kom laowwe gauw naor Bethlehem gaon om te kieken wat of daor te redden is. Kieken of et waor is wat oons verteld is.”

Ze gongen vlogge op pad, en ja heur ze vunnen Maria en Jozef mit een poppien in de voerbak. Ze vertelden wat heur die naacht overkommen was. Doe gongen ze et dorp in. Elkeniene ston versteld van wat de huders zeden. Maria was slim wies mit de verhaelen. Et maekte heur hatte bliede.

Jimmy

Graeg vernemen we jow reaksie

Deze website gebruikt Akismet om spam te verminderen. Bekijk hoe je reactie-gegevens worden verwerkt.