Berkoop/Wolvege – Ieder jaor bezorgen zoe’n twintig vri’jwilligers van de Stellingwarver Schrieversronte veul bewoners van alle Stellingwarver zorginstellings en verpleegtehuzen en De Menning in Wilhelminaoord een prachtige morgen of middag.

Stellingwarfs
In alle plakken wodt d’r dan veurlezen in et Stellingwarfs. Et tal plakken daor veurlezen wodt is de laeste peer jaor gruuid. Zo wodt gaon een tal veurlezers ok naor kleinere centrums veur dagopvang toe. Blieken dot vaeks dat meensken bi’j et heuren van verhaelen in heur eigen tael dat as arg vertrouwd erveren. Et gebeurt dan ok nogal es dat d’r dan hiele gesprekken op gang kommen, zodat tal van herinnerings mit mekeer de revu passeren.

Meziek
Sommige veurlezers nemen behalven heur verleesmappe ok heur meziekinsterment mit en zingen bekende oolde lieties mit de bewoners. Die mooie ofwisseling van verhaelen en meziek wodt deur et pebliek ommeraek wardeerd. Hiel vaeke wodt trouwens an de veurlezers vraogd of ze niet wat vaeker kommen kunnen, en pattie veurlezers voldoen daor graeg an.

Veurleesmappe
De veurlezers maeken gebruuk van een speciaole veurleesmappe die jaorliks anvuld wodt mit ni’je verhaelen en gedichten. Daor zorgde Schrieversrontevri’jwilligster en koördinater van de aktie, Kiena Bouwer van De Haule, ok dit keer weer veur.

Foto’s: In et MFA van Berkoop las Hendrik Betten veur, wiels Hielkje Nieuwenhuis en Thijs Hofstee aktief weren in Sickengaoord in Wolvege

(Tekst: Sietske Bloemhoff; Foto: Lenus van der Broek).