Veul verkocht tiedens sutelaktie

Berkoop – Wethoolder Fimke Hijlkema en Schrieversronte-veurzitter Klaas van Weperen deden oflopen weke ommeraek goeie zaeken in Berkoop. Tegere zetten ze heur in veur de jaorlikse sutelaktie van de Stellingwarver Schrieversronte en kwammen, doe et al duusterde, dikke tevreden weeromme. Dat gul diezelde aovend ok veur alle ere vri’jwilligers die mit Stellingwarver boeken et pad uut weren om die an de man te brengen.

Uutverkocht

Mit mekeer wodde d’r dit jaor veur zowat € 8.000,- an boeken, kelenders, filmsticks en kaorten verkocht. Een opbrengst waor de uutgeveri’je van de Stellingwarver Schrieversronte slim wies mit is. Omreden d’r, mit naeme deur ziekte, toch wat minder sutelders weren as in de veurgaonde jaoren was dit bedrag meer as waor op hoopt wodde. Zat veurig jaor de verkoop van de boeken al in de lift, et risseltaot was dit keer dat d’r per kroje ongeveer veur etzelde bedrag verkocht wodde. Toppers in de verkoop weren et ni’je boek ‘Luudklokken en klokkestoelen in Stellingwarf’ van Jan Koops en Sietske Bloemhoff en de Stellingwarver Spreukekelender 2020.

Ien boek raekte liekewel hielemaole uutverkocht tiedens de sutelaktie, en dat was ‘De Friese Waterlinie’ van dr. Meindert Schroor. De Stellingwarver Schrieversronte het mit de historikus ofpraot dat d’r laeter dit jaor of begin 2020 een bewarkte herdrok van et boek verschienen zal.

Wethoolder Fimke Hijlkema en SSR-veurzitter Klaas van Weperen in Berkoop . Foto: Lenus van der Broek; tekst Sietske Bloemhoff.

 

Graeg vernemen we jow reaksie

Deze site gebruikt Akismet om spam te verminderen. Bekijk hoe je reactie-gegevens worden verwerkt.