Wolvege – Roem 25 meensken trotseerden vri’jdagaovend ’kode oranje’ om in museum ’t Kiekhuus in Wolvege een biezunder smoeke aovend mit te maeken. Daor hullen Roelof en Sjoukje Bakker veur de twiede keer een Stellingwarver verhaele-aovend, naodat in 2018 de eerste ommeraek ansleugen was. Opni’j konnen de bezukers luusteren naor een mooie verscheidenhied an verhaelen, waor ok now weer mit veul interesse en plezier naor luusterd wodde.
Op een viertal plakken wodde in et museum verteld. Koosje Hornstra van Der Izzerd vertelde op enthousiaste wieze verhaelen over erverings van heur in et onderwies, wiels Jimmy Visser heur herinnerings ophaelde over de tied dat ze as kiend opgruuide in de Karkstraote in Wolvege. Jaap Sikkema, ok van Wolvege, is de laeste tied slim aktief mit zien schrieveri’je in et Stellingwarfs. Zo publiceert hi’j o.e. in et Stellingwarfs tiedschrift De Ovend en de Stellingwarver Spreukekelender. In de ‘Stellingwerf’ bin butendat op ’e bladziede ’Stellingwarver Zaeken’ ok nog al es anekdotische verhaelen van him te lezen. Een tal van zien verhaelen vertelde hi’j vri’jdagaovend. Tot slot vertelde Roelof Bakker van et museum o.e. zien verhael over de rutetikker. Die ston vroeger in de etalage om meensken te verleiden de winkel in te gaon, en is uteraord in et museum te zien.
Et doel is dat Museum ’t Kiekhuus in 2020 opni’j een Stellingwarver verhaele-aovend orgeniseren gaot.
(Tekst: Sietske Bloemhoff; Foto: Lenus van der Broek)