Vleden vri’jdag het oold-direkteur van de Schrieversronte, Sietske Bloemhoff, mit een symposium officieel ofscheid neumen. Vleden jaor december was zi’j al stopt as direkteur, mar deur corona was et ofscheid d’r nog niet van kommen. Der weren mooie woorden van de veurzitter, bloemen en een boekien dat speciaol deur de vri’jwilligers saemensteld was veur Sietske.

Vanzels blift Bloemhoff wel aktief as vri’jwilliger veur de Schrieversronte, want et Stellingwarfs zit heur in et heufd, et lief en et hatte.

Naodat ze vanof meert 1984 an et wark was bi’j de Stellingwarver Schrieversronte,

waorvan de laeste veertien jaor as direkteur, is Sietske Bloemhoff an et aende van 2020 mit pensioen gaon. Deur corona kon et ofscheid niet eerder holen wodden, mar op vri’jdagmiddag 29 oktober is d’r op verzuuk van Sietske een prachtig ofscheidssymposium holen, waor et laandschop van de Stellingwarven centraol ston.

Veur et symposium weren op verzuuk van Sietske drie sprekers vraogd. dr. Meindert Schroor (historikus) vertelde over Grensland Stellingwerf, geografische aspecten van de politiek en adminstratieve grensvorming tussen Friesland, Drenthe en Overijssel.

De titel van de lezing van perf. dr. Theo Spek (hooglerer laandschops-geschiedenis) was Naar een landschapsbiografie van de Stellingwerven: nut, noodzaak en mogelijke aanpak. Stellingwarver drs. Dennis Worst (laandschopshistorikus) vertelde over de ontstaonsgeschiedenis en ontginningsgeschiedenis van Ni’jberkoop, de woonplaetse van Sietske Bloemhoff.

Nao de ofsluting van et symposium was d’r een gezellige naozit, mit happies en draankies. Elkeniene kon persoonlik ofscheid nimmen van Sietske.

(Foto: Lenus van der Broek)